فتافيت الهم بقلم الشاعر المبدع / رضا ابو الغيط
فتافيت الهم المتنطور
فوق الطرقات
والشعر الشايب من خوفى
وأنين الذات
دايما يزوروني ف أحلامي
ويا الأموات
ويقولوا حاجات
وحاجات بتطل من الضلمه
وصريخ وآهات
بتشد الفرح اللي ف حُضني
من بضع ساعات
وبتسرق دايما أيامي
ومقام الصبر اللي مالي به
طول عمرى كاسات
وبتزرع خوف
حوالين الجوف اللي ماداقشي
طعم الشربات
وأبات الليل ....بين هم وويل
وعقارب أسرع من عقرب
أجدعها ساعات
بتبث السُم اللي ماليها
ف ثنايا جلد الأوقات
علشان ماتموت وتخش تابوت
ومنبه عمرى المتعطل
يعلنها ..... سُكات
ويخش جحوره المليانه
صبيان وبنات
ويبات يستني اللي ماهمه
لون الكوابيس
يفتح له أبوابه المقفوله
ويكسر كل الترابيس
مع صوت الفجر اللي بيعلن
عن نور الشمس المتوضى
من نيل الحلوه اللي بتشبه
كليوباترا مصر المحروسه
ست الستات
وفوارس من جيشنا الحارس
الأرض الطاهره اللي عشانها
عايشه الأموات
وتملي ....تُبدر بإيديها
ف ضواحي بلادى وحواريها
م النصر رايات
تعليقات
إرسال تعليق