نفس النص بقلم المستشار / رضا ابو الغيط
نفس النص
بيزورنى تملى ف أحلامى
من غير ما يحاول يستأذن
او يرمى سلام
على باقى احلامى المركونه
فوق الدولايب
ونحيب الذكرى اللى ما نطقت
م الحزن كلام
وبيرسم باللون القمحى
تفاصيله اللى بتشبه جرحى
فوق شاشة عرض الأيام
وبإيده يخنق بشويش
ألوان الضى المتسرسب
من خرم الشيش
ويقول هنعيش
مع بعض الليله وكام ليله
عرض الأوهام
ويقرب
من ودن النايم م المغرب
فوق كوم اشواك
وبهمسة صوته اللى ما عدت
بره الشباك
بيقول لى بكره هتتعدل
وهتبقى تمام
ويخَرج من كُمه أمانى
وأغانى من عالم تانى
بترفرف فيه الأنغام
ويشد ف ايدى المربوطه
بحبال الضلمه المفتوله
بلون الكوابيس
ويقول هنهيص
مع كل حروف النص المرسومه
بإيدين فنان
عاش يحلم حرفه يجمعنا
على كلمه بتخلص للمعنى
ان شا الله... عبر الأحلام
********************
تعليقات
إرسال تعليق