تفاصيل بقلم الشاعر المبدع / رضا ابو الغيط
تفاصيل الصوره اللى اترسمت
لعجوز كان واقف مستنى
القطر إياه
وهواه يتشعبط ف الحاضر
مع كل الناس اللى بتحلم
بأجملها حياه
صبحت توهان
ورتوش.. بتعارك ف الأركان
وزمان نعسان
صبحت أوهام
ومطارق م الخوف الطارق
بتهد كيان.... عزم القضبان
وتقوى خطوط قضبان الآه
ف قلوب الناس اللى بتنداس
بأقدمها مداس
ف رجول المال وأصحاب الجاه
ورجول العدل اللى ما شفتوش
غير صوره بتشبه للفنكوش
على ناصية حوش
الظلم إياه
حتي البرواز
بقى يشبه جدا للألغاز
ف ساعات يتراءى للنن العين
انسان وحزين
ودموعه بحور فوق الخدين
وساعات بيطير زى العصافير
ويمد الطرف لطرح الخير
ويعيش جواه
وساعات بيكون
أوهام وظنون
محشوره ف جوف أنابيب الغاز
مع كسر إزاز
بيفجر كل عزيز نهواه
تعليقات
إرسال تعليق