من بين الشيش بقلم الشاعر المبدع / رضا ابو الغيط
ع الشط التانى من الدنيا
واقف أتأمل ف ملامح
نَفْسى اللى بتغرق ف دموعى
مع شمعة عمرى اللى ما قادت
أو واست
أنوارها ضلوعى
بتأمل
زعابيب الريح اللى بتعوى
بين المخاليق
أوقات الضيق
ف طريق الحيره اللى ماسامع
صرخة ايامى
وللا همه يلون احلامى
جوه الصناديق
بألوان الصبر اللى مصبر
كام ألف غريق
بتأمل كل اللى جرالى
ودموع العين اللى بتنزف
فوق خد جريح
على ناصية يومى اللى بيندب
من غير تصاريح
ع الحلم اياه المتغرب
بين الامواج
وافواج الناس المربوطه
بحبال الخوف
وتملى تطوف
حوالين التايه من نفسه
ف مواجع أمسه اللى ماهمه
يتسرسب دمه
فوق ارض الخوف المشتاقه
لحزين مشتاق أرض تضمه
أو يلقى طريق
مفروش بالفرح اللى ما حاول
يملا الأبريق
ع الشط التانى من الدنيا
بتأمل
جوفي اللى مالاقى
فتافيت العيش
والجسم اللى ما لاقى الهدمه
اوحتى الريش
وتملى بيشكى من الوحده
والفكر المتغمى تملى
بإيدين الخيش
ع الشط التانى من الدنيا
رغم الأوجاع
وسنين العمر المفقوده
ف صراع...... وضياع
مع نفسى التايهه ف أحزانها
مستنى الشمس اللى بإيدها
شايله الجناحين
للطير اللى ما قادر ينهض
وللا حتى يبيض
ف بنانى عصر التهميش
ومناه يتشعبط ف القشه
علشان ما يقابل احلامه
مع نسمة فجره اللى بتدخل
من بين الشيش
*********************
تعليقات
إرسال تعليق