زى ما أحنا ميتين بقلم الشاعر المبدع / الطيب عوض أحمد

ويفضل نفس السؤال
ليه شمسنا غادرت مدارها
ليه كل حته فى جسمنا إحساسها برد
ولو سألت عن الدفا تلاقيها كارهه
يا ترى كره فى الشمس اللى غابت
ولا دا لجل تنسى الخلق تارها
وسؤال لكل المحرومين المظلومين
واللى قابله بوضع رفضاه الظروف
امتى بقى نفوق من الخوف
امتى تحس إنك بشر
قادر يغير قادر يكمل ينتصر
قادر يشوف الشمس رجعت للمدار
والخلق غسلت من الجبن عارها
ليه كل حاجه وليها وقت
هى الاجابه السايده دايما
وليه لما أحس بأنى فى حكم ميت
أحاول أقتل احساس الخلق تما
قوموا نصلى على النخوه اللى ماتت
بس السؤال
ازاى نصلى واحنا لسه
أرواحنا متعلقه بين السما والأرض
طب هل يجوز بأن ميت يصلى على ميت
وأنه يدفن وأنه يدعى له برحمه
ولو يجوز مين يؤم
مين يؤم والكل ميت
مش مهم
خلص إنت بس فرض العباده
وسيب مصيرنا للشيطان
هو قادر هو فاجر
رغم أنه فى الأصل أجبن من جبان
هو جبان بس قادر
وإحنا جبنا والفجر فينا
بس خايفين الكلام
علشان كلامنا بيصحى أرواحنا
ويحيي احساسنا الحزين
فسيب كل حاجه للسنين
وسيبنا إحنا زى ما إحنا ميتين