تقاوى الحريه بقلم الشاعر المبدع / رضا ابو الغيط



حرمت أتشعبط
من تاني
ف خيوط الوهم
 اللي ماهمه
حلمي المسكين
وسنين الحزن المتغمس
ببواقي أنين
ودموع اليأس اللي بتطفي
 نور الخدين
حرمت اتشعبط
من تاني
ف خطاوي
 ناسيه العناوين
ورنين المال اللي بينسي
أصل التكوين
والطين الطارح ف المالح
فِكر الملاعين
حرمت أآمن
لعواطف
بتشق القلب لنصين
ولنن العين
اللي ما شايف
القلب الطارح ياسمين
حرمت أآمن
لشفايف
بتدارى عيوب الخاينين
ونويت أطهر من أمسي
بالصبح الواقف مستني
كل التايبين
وتملي بيعزف ويغني
أشواق .. .... ..وحنين
ويمد الكف المتحني
بالنور الطارح ف مطارح
بتسُر العين
لقلوب الناس المشتاقه
تحضن مياديين
مزروعه تقاوى الحريه
وقلوب بِتْلين
للصوت الخارج من لفه
كات شايله جنين
مشتاق يتغذي الوطنيه
وسلام بترفرف أعلامه
فوق الملايين.........


تعليقات

المشاركات الشائعة من هذه المدونة

ماحدث بالأمس...رواية قصيرة بقلم القاص المبدع / رشاد الدهشورى .الحلقة الثانية

من سنين بقلم رضا ابو الغيط

العدل فين يامحكمه للشاعر الكبير رضا ابوالغيط