جواب بقلم رضا ابو الغيط

جواب
********
زوجتي الغاليه
أم الواد
من بعد السلامات
وكلام بيحلي الجوابات
حابب اطمن ف الغربه
واسأل ع الحال
وظروف البال المتحير
من أجل الزاد
حابب اطمن ع الدار
والجار
والصُحبه اللي ما شُفتش منها
غير فرحى الطارح بميعاد
محتاج اتطمن يا أصيله
ع الشيله
اللي تهد جبال
وشواشي الطرح اللي بيسأل
فينه الحوال
والساقيه اللي ما لاقيه الميه
وللا حتي بتلف شمال
بيقضى المال المتحول
ويكفي الواد
اللي من أول عامنول
بيكح رماد
وتملي بيخرج يتسول
من النخل الزاد
وعشان ما يدوق الطعميه
بيلف بلاد
الحال مستور
وللا لساكي بجلابيه
من توب دمور
ومخاصم عينك يا صبيه
لون الكستور
والطارحه بتاعت بنت اختك
الحاجه سعاد
لساه الشق اللي ف رجلك
يطلع شبرين
من مشيك حافي ع الترعه
لجل القيراطين
دول حتي ايجار
وايجارهم نار
والقمح الطارح ف خطوطهم
طول عمره ما فكر يسعدنا
ويخش الدار
وعشان الدين اللي ما همه
دمعي اللي بينزف من همه
يتباع ف مزاد
وطريقهم مليان أوغاد
وحبال ووأتاد
ومناهم ما تربي الواد
وتبيعي الحُب اللي ما بينا
من قطر سنين
وحنين بيصبر ف قلوبنا
ويداوى أنين
وانا عارفك زين
بتسُرى الحزن اللي ف قلبك
ودموع العين
ف الشال الحيله اللي ف دارنا
وبقاله سنين
وسنين العمر اللي ماشافت
غير قلب حزين
علي زوج متغرب ف الدنيا
من اجل الزاد
من أجل ما نفْرح ونفَرح
الدار بالواد

*******************
رضا ابو الغيط