رسائل الثانوية العامة بقلم الكاتب أنور عطية

• رسالة لطلابنا المقبلون على الثانوية العامة :
--------------------
- سأكتب رسالتى هذه باللهجه العامية المصرية لكى تصل بسهولة إلى طلابنا الأعزاء .. وإن كان حد يعرف طالب لسه داخل تالته ثانوى السنادى يعمله مشاركه للرسالة دى على صفحته علشان الكلام دا مهم جدا وممكن يستفيد منه بإذن الله :
- أولا :
------
بما إن الدروس الخصوصية أصبحت سنه من سنن حياة الطالب وولى أمره بسبب فساد المنظومة التعليمية داخل المدرسة حتى أصبحت الدروس الخصوصية ظاهرة قوية فى المجتمع المصرى أقوى من أن تستطيع أى مؤسسة محاربتها ، لدرجة أننى على ثقه بأن وزير التربية والتعليم ومساعديه إللى بيحاربوا الدروس الخصوصية أولادهم بكل تأكيد بياخدوا دروس خصوصية .
- علشان كدا لما تختار مدرس لدرسك الخصوصى فى أى ماده تسيبك من كلمة "كله بيروح عنده" لإن الكلمه دى ضيعت مستقبل طلبه كتير ، وسيبك كمان من كثرة عدد الطلاب إللى بياخدوا درس عنده لإنه مش مقياس لكفائته وقدرته على توصيل المعلومة للطالب .
- المطلوب منك تعمله .. عندك أول شهر جرب فيه لحد ما تستقر نفسيا وتتيقن من صحة إختيارك للمدرس .
- ثانيا :
------
 إختار المدرس اللي تحس إنه حابب مهنته بصفه عامة ومادته بصفه خاصه .. ساعتها شرحه هيكون خارج من قلبه وبضمير وهيوصلك بكل بسهوله .
- ثالثا :
------
 إستشير مدرسك فى أى حاجه تقابلك متعلقه بالدراسه وإبتعد تماما عن إستشارة زمايلك إللى فى نفس سنك لإنهم معندهمش الخبره إللى تفيدك لإن زيك زيهم .
- رابعا :
------
 دخولك ثانوى عام معناه إنك عندك هدف عاوز تحققه .. أوعى تكون زى القطيع وخلاص ، "أى حد ممكن يدخل ثانوى عام .. بس مش أى حد بيكون متميز" .
- خامسا :
------
إتق الله في أهلك وإعرف إنهم بيصرفوا عليك من دمهم وعرقهم وشقاهم .. فإن مش هتكون راجل من البداية فبلاش منها من الأول .
- واخيرا :
------
فى الثانوى إن مكانش فيه زمايل كويسين يدفعوك للتفوق يبقى تمشى لوحدك أفضل .

- ربنا يوفقكم جميعا ويحقق احلامكم .
________________