مجرد مشاعر للشاعر رضا ابوالغيط

مجرد مشاعر
*************
وابتدت
 كل المشاعر تترسم
 فوق الورق
حبة حروف متنطورين
 فوق السطور
صابهم زهق
من كتر افكاري اللي باتت
فوق فراش اليأس
تترجي القلم
ينزف وجع
وتحايله يرسم بالدموع
 اجمل مشاعر تِتْقِري
من قلب شاعر عاش جدع
لحظة ميلاد اول قصيده
م العدم
داخل حدود
 قلبه  اللي متوضي بورع
واشتاق  يشوف
 زى الألوف
حلمه اللي  من خوفه انخنق
ازاي هيبدأ خطوته
وتشوف عينيه نور سكته
رغم الحصار اللي انفرض
علي كل أنواع الورق
وازاي هيبدأ ..من جديد
ياخد بتاره ......من عبيد
أحلامها ....تخرس كلمته
من قبل ما تقول .....النبأ
وازاي هيبدأ من جديد
يعلن وجوده ف الحياه
ومعاه حروف قلب الديوان
مفتوله من طوق النجاه
بيمدها وسط البحور
تنقذ قصيدته من  الغرق
وبإيده يبدأ طبطبه
فوق الحروف المنهكه
من  معركه
كان فيها حرفي اللي انكتب
لحظة غضب
داخل سبق
مع كل أمواج الحياه
داخل.. محيطات القلق

***********************
رضا ابو الغيط