سؤال عفيف للشاعر رضا ابوالغيط

سؤال عفيف
*************
اتسرسب عرقى اللى بيشكى
 من حر الصيف
فوق عدسة... عين النظاره
والأمر مخيف
مش شايف فين المستقبل
والحاضر دايما .. يستهبل
من كُتر الكيف
وبتوه .....ف معالم سكتنا
وبيوت بتقول ...انها بيتنا
ف مدينه وريف
ايه اللى بيحصل مش فاهم
جاهل..... متحكم  ف العالم
بكلام تخريف
والحرف الحاضن كراسى
بيهز العقل اللى ف راسى
وربيعه خريف
 بسأل..... وبحاور  أولادى
مين اللى اتحكم ف الوادى
وسؤالى عفيف
مين اللى هيحكم أوضاعنا
ويحس بقسوة أوجاعنا
ومعاه التصريف
الديب الحاوى السحلاوي
وللا اللى بيكتب ف غناوى
وللا الاشكيف ؟؟؟

**********************
رضا ابو الغيط