صراع الزمن بقلم الشاعر المبدع سامي محمود حنفى
لا السنين مبسوطة بالايام
ولا الساعات طايقه الدقايق
ولا حد فينا قادر ينام
ليلة واحدة وباله رايق
الكل تايه ف الحياه
ومين بقى فينا بس فايق
حتى اللي صوت ضحكوا عالي
جواه كتير لونه غامق
لا السنين مبسوطه ب الايام
ولا الساعات طايقه الدقايق
ليه اتغير بينا الحال
ليه جوانا الفرح اتشال
ليه حولنا حياتنا لغابة
والكل فريسة لقلق البال
والمبسوط فينا كداب
والكداب عامل مبسوط
لحد ما توهنا احنا الاتنين
ومبقاش فينا حد طايق
لا السنين مبسوطه ب الايام
ولا الساعات طايقه الدقايق
صفوا القلوب ترتاح عقولكم
وانسوا السواد يبيض بالكم
خلوا الخضار يطرح ما بينكم
تلقوا العمار يرجع قلوبكم
يتغير كل المشهد بينا
يرجع طعم الخير حوالينا
تنور تاني الفرحه عينينا
ولا حد يبات تاني متضايق
لا السنين مبسوطة ب الايام
ولا الساعات طايقه الدقايق
تعليقات
إرسال تعليق