"أنا الخطأ" .. بقلم الشاعر المبدع/رضا أبو الغيط .

** أنا الخطأ **
كلمات / رضا أبو الغيط
*********************
أنا كًفه  مايله ف الحياه
وحياتى منى بتنسرق
أنا طوق نجاة كل البشر
ولكنى وحدى باانخنق
ومن الجميل
ألقا الدليل قبل الفزع
لو حتى كلمه صغيره
متنطوره فوق الورق

أنا شمس تايهه ف المدار
وقت النهار
لما الشعاع من ظلمكم
صابه إنكسار
انا موجه تايهه ف بحرها
طول عمرها
با أحلم على شط الحياه
ألقا النجاه و آخد قرار
ينقذنى من .. ناب القلق

انا شَعرى شاب رغم الشباب
والصوت أنين
أنا جدر ى خاب جوه التراب .
.والليل حزين
أنا فرع ناشف ع الشجر
مستخسرين فيه الحجر
وانا معطيات المسأله
وجواب جميع الأسئله
يا اللى تملى بتسألوا
عنى السنين

انا مش على
ولا حتى خيط ف العنكبوت
أتحدى بيه ظلم الطاغوت
أنا مش يمامه ف النهار
سكنت ف غار
أنا م الصغااااااااااااااااار
وبخاف تملى أنحشر
جوه التابوت

أنا مش عُمر
ولا حتى لابس هدمته
أنا لسه بادئ اهتدى
وأعرف طريقه وسكته
سالك دروب صدق القلوب
ولعلى أوصل للورع
وأعرف أنام فى ضِلته

أنا مش نبى
ولاحتى معصوم م الخطأ
أنا الخطأ...
معلن وواضح ع الملأ
با أحلم أتوب  من الذنوب
ومن القلق
قاصد كريم – قادر- عليم
ربى العظيم اللى خلق