اخر قصيدة بالديوان للشاعر الكبير رضا ابوالغيط

آخر قصيده ف الديوان
************************
عنوان قصيدتي المرتقب
قلب العرب
موجوع قوي
من كل سهم بتحدفه ايد العدا
ع اللي ابتدى
يفرد جناحه للسما
وحب إنه يعيش سوى
رغم التعب
واللي انكتب فوق الجبين
بإيدين شمال وايدين يمين
وكاسات كتير داق مرها
كان نفسها ...يفضل ذنب
عنوان قصيدتي المرتقب
قلب العرب
صابه الألم
من كل سهم بيحدفه
مجنون وعامل فهلوى
وبيدعي انه انظلم
وانه الوحيد في اطلسه
مركون علي نفط ودهب
وقاعده قاعده بتحرسه
رغم الظروف رغم الهرب
وانه الوحيد اللي ضرب
كرسي ف كلوبات الفرح
ع الرغم ان المعطيات ف المسأله
 واضحه وكمان متفسره
لا هي محتاجه جدع
يقدر يقيس حجم الوجع
وللا حابه كتر الثرثره
وان قستها بالمسطره
 أو حتي بحروف منقله
هاتشير علي انه انبطح
وفوق قفاه.... ياما انضرب
عنوان قصيدتي المرتقب
قلب العرب
صابه الوهن
لما ف يوم قال العفن
انه السبب
 ف كل اسراب المحن
وانه اللي عكر صفونا
وانه اللي شاقق صفنا
وانه اللي زعل مننا فرح الزمن
لحظة ما تمتم ع الشاشات
انه السبب ف كل انواع الشغب
وانه العريس المنتظر
لعروسة كات فاقده البصر
متمسكه تمشي ورا
أفكار لحمالة الحطب
وعجوز ف اسمه تشوف لهب
آخر قصيده
ف الديوان اللي انصلب
فوق المشانق والمقاصل ياعرب
مكتوبه من بحر الوجع
فوق سطر كان حلمه الامان
قبل الحريق اللي اندلع
وأمور كتير ليها العجب
آخر قصيده ف الديوان
كاتبها شاعر زيكم
ودمه كان من دمكم
حلمه ومناه
تحلو ليه يوم الحياه
وتمدوا ليه طوق النجاه
والحلم ....
لو يوم تتقري
أخر قصيده ف الديوان
مكتوبه من دمع الألم
وتكون لنا صوت الأدان
يوصل ما بينا ونفتخر
بخريطه بتضم العرب

***********************
رضا ابو الغيط