الخاله نوال بقلم المبدع الشاعر/رضا أبو الغيط

الخاله نوال
حالها كان عال
عندها م المال
يجى ألف ريال
لكن بعلها
كان بيقولها
نفسنا يا نوال
يبقى لنا عيال
يلعبوا ف البيت
والحوش والغيط
وينقوا الزرع
من الشُبيط
ويكونوا الضله
على الحَوال
وان يوم مشغول
يجنوا المحصول
ويعبوا الفول
م الغول ف شوال
نفسى ف حسانين
واحمد وحسين
وبنات حلوين
وجمالها جمال
ده الضنا ف الريف
من غير تزييف
اغلى عندنا
من ألف رغيف
وكنوز المال
والغاليه
بتدارى دموعها
وتقيد له
بالفرح شموعها
ما هى خايفه
جوزها يودعها
ويزود
جرح بيوجعها
ويروح لمنال
أصل الدكتور
احمد مشهور
ومعاه
يجى ميت
مليون دكتور
قال لها يا نوال
الراجل عال
والعيب الظاهر
كان عيبك
والواجب
ترضى بنصيبك
وادعى المتعال
دالمولى
 قادر يا صبيه
يرزق
أمثالك ذريه
احمد
ومحمد وهنيه
ويرتاح البال

************
رضا أبو الغيط