"يجوز" .. بقلم المبدع/رضا أبو الغيط .
- يجوز
********
جايز قوى
بعض المبادئ والقيم
سابت مكانها اللى اترسم
جوه النفوس
لحظة ما حست اننا
صابنا النشوز
وبقينا أشبه بالبقر
مستنين عطف التيوس
جايز قوى
سحر الفلوس
غطا على
صوت الضمير اللى انعدم
بكوام تراب
لحظة ما غاب
عدل الأمير المحترم
جوه السراب
لحظه ما سيبنا عقلنا
للجهل وسنين الضنى
تدعك بأفكاره الفانوس
جايز نبوس
ايد الخسيس اللى ابتدى
يركب على ضهر الفضا
وحلمه يخلص م العرب
واللى هرب
من مقصلة
حرب البسوس
جايز قوى
حالنا يكون بالشكل ده
والبعض يركع للعدا
ويحب ترجع تحكمه
نار المجوس
جايز قوى
بعض القلوب الموصده
م المعطيات والأرصده
تعشق ف يوم حضن الصدا
واللى عليها بجزمته
دايما يدوس
جايز قوى
ننحنى
أو عودنا مره ينتنى
ونطاطى
م الخوف الرؤوس
لكن يجوز
نرجع نفوق
ونبص فوق
ونلاقى للقمه الغموس
لكن يجوز
ترجع مصانع غزلنا
ونكون لها عزم التروس
والأرض خيرها يعود لنا
ويعود لها. لحن الفؤوس
*****************
رضا ابو الغيط
تعليقات
إرسال تعليق