حنين بقلم رضا ابو الغيط ه

حنين
***********
ابني الغالي
وتملي مسافر
 متغرب ف بلاد الله
بعد السلامات
 والدُعا تتقرب من حضني
وتقصر بينا المسافات
بااكتبلك ...من شوقي إليك
 وبلهفة قلبي.....  الجوابات
علشان  تطمن وتطمن
قلبي اللي ما بطل يا ضنايا
يسألني عليك
وتطل عيونك علي أمك
ان شاالله بكلمه مكتوبه
 فوق الورقات
وتمد ايديك
المربوطه بحبال الخوف
تمسح لي الدمع المتنطور
فوق العتابات
وتبل الجوف اللي ف بُعدك
مش لاقى دواه
ابني المتغرب ف بلاد الله
مع خلق الله
من أهل النجع اللي مالاقي
غير قولة آه
طمني عليك ....ايش الأخبار
وازى الصُحبه اللي معاك
ودواك اللي انت مسافر تلقاه
ف بلاد.... ما تخاف الله
وللا حاسه بقلبي المحروق
من قولة آه
علي نور القلب المتغرب
علشان القوت
ومناه يتطمن ويطمن
 ف الغربه ضناه
طمني عليك
علشان م اتطمن واطمن
أهل اللي معاك
بتلاقوا المال
والحال بقي عال
والعيشه هناك
تستاهل تبعد عن أمك
ليل ويا نهار
تستاهل تتوحش زوجتك
وتفوت الولد المتشال
تستاهل تخرج م الدار
وتطفي بإيدك لنوار
تستاهل دمعي اللي ليلاتي
ع الخد ينوح
والحال المايل من بعدك
وجروح بتعافر ف جروح
كده فين ما نروح
ابني المتغرب ف بلاد الله
مع خلق الله
من فضلك ابعت مكتوب
د انا مش ايوب
طمني عليك
واكتب لي اخبارك بصراحه
بتلاقي  هناك
اللقمه ياغايب  والراحه
وسفينة نوح
وللا يا ضنايا
الحال مش عال
 واللقمه بتيجى بالعافيه
 وطلوع الروح
والجرح اللي تملي بينزف
مش لاقي دواه ؟؟؟؟؟؟
ابني المتغرب ف بلاد الله
وتملي من قلبي قريب
مش قادره ابطل اتحدت
 وياك ياغريب
ملعون المال اللي يفرق
عن عيني حبيب
ويزود جرحي اللي ماراضي
م الغربه يطيب
ملعون المال اللي بيحرم
م الأهل ضناه
وان كان ده يا ولدى المكتوب
وما منه هروب
فاانا راضيه.  .... بقضاء الله

***************************
رضا أبو الغيط