كلام والسلام
احنا بتوع الكلام ...
الليل للسهر والنوم للنهار....
كله كلام فى كلام ....
الافعال ما لها فى دنيانا مكان ....
التطبيل ما شاء الله احلى كلام ...
والزغاريد عَوَجتْ اللسان .....
قعدة العصارى تسمع فيها احلى كلام ..
الواد حسين محلل أقتصادى خريج اليونان...
الواد محروس محلل سياسى من هارفرد كمان...
اما الواد سعيد بسم الله الرحمن ......
اعلامى خريج امريكا من زمان .....
البت سنيه دى بقى محللة نفسانية
لمجتمع يا ولاد الحلال غلبان ...
الحكايه فعلا.....
فى سعاد دى استاذة علوم مستقبل....
ودكتورة فى جامعة دراسات ...
شعب الفتاوى والكلام مالك سلامات ! ....
الهم والغم ماشى فى وريدك دم ....
البانجو والاقراص والبيره صارو وشم ....
الصيدليات من طوابيركم جالها الهم ...
عقلك وتفكيرك بين رجولك يا عم إتلم .....
خدها منى. واعتبرها كلام والسلام ...
البلاد مش هيبنيها كلام ....
ولا كمان حكاوى مصطبات ...
البلاد محتاجه افعال رجال ....
صفاتهم ....سمارهم من الشقاء ....
وتشقق اليد من غرس الخير .....
فى رحم الجبال الراسيات .....
كفايه يا واد أنتْ ......
وإنتِ يا بنتْ....
اخلعوا كلام الحكايات .....
وقعدة فلان وفلان ...
وده اتغرب....
وده اتهور....
وده اتعور ....
ما هو اللى فات مات ....
والحكايات صدقنى والله .....
مش هتعمر مجتمعات ....
خدها بالفصحى طيب ....
ايها الساهر ليلاً
ستسأل عن العمر يوماَ
وحتى كلامى برضه كلام .....
كام تعليق وشوية اعجاب ....
بقول لكم ايه....
يلا كفايه والسلام تِـعْبْ مني الكلام
تعليقات
إرسال تعليق