بلاد السندسيان
بلاد السندسيان
بقلم . شحات خلف الله
من بلاد السندسيان مصر السلام أهديكم منى أحلى سلام .....
وما يحلى الكلام الا بالصلاه على سِيد الأنام ....
وجايبلكم معايا بشارة من مناام .......
شفتها للواد حسين أبو عمه وشال....
اليوم وقبل شويه يعنى من حوالى عشر ثوان .....
شفت منام حلو أوى يريح القلب ويروى العطشان .....
قال ايه الواد حسين أبو عمه وشال لابس قفطان .....
بيضحك ويغنى وبيقول أنا وصلت يا خال .....
وكان شايل على كتفه شوال وماسك بإسنانه جِلّده خضرا عليها شعار....
ما صدقت صحيت من المنام الا وطلعت على جوجل وتفسير الأحلام ....
كتبت الكام كلمة ووصفت المنام لقيت صفحات اكوام واكوام .....
كلهم قالوا ده تبديل من حال لحال وواد أختك هيتغرب ويرجع قوام .....
بس هيشتغل ويجيب فلوس وحاله هيبقى تمام التمام .......
قلت يا سلام واد المحظوظة طلع فلته وحظه زى النار ....
مش زى عبعال اللى من الهم خلع حتى الاسنان ....
بس بينى وبينكم ....
وصلوا معايا على النبي العدنان .....
هيه صحيح بشارة خير وأحلام فى عقول الغلابة وولاد العم والخال .....
لكن بالنسبالى مجرد أوهام.....
وسراب عطشان فى صحراء جافه فى صيف حراراته زنهار ....
الغربه مش إنتقال من مكان لمكان ....
ما انت فيها عايش متغرب من زمان ......
تعبت من كثر الكلام .....
والغربه كان قلت عنها كلام ومعان....
بس مين يفهم ويوعى للكلام ....
انا هأفضل فيها وبيها وهتفضل بلاد السُنْدسْيان الهرب فيهاحلم لعنوان غلبان ......
هأفضل فيها وليها وهأعافر ليل ونهار .......
ومش هأبيع الجلدة الخضرا ....
أم احلى شعار حتى بكنوز السلطان .....
هيه صحيح ...
تاعبانا أوى يا حسين وليلنا فيها نهار....
وعبدالعال شايل فيها الغلب من قَديم الزمان .....
بس برضه ما يوازيها مال ولا عيال ......
وهنفضل نعافر ونعافر ...
لغاية ما تبقى اجمل وردة فى بستان ....
وعبدالعال ينصلح ليه الحال ما هو قادر المنان يخليها سُندسْيان ....
ملحوظة :
مفاهيم خاصة بالكاتب ومغزاها فى الخاطرة ......
1/ معنى السندسيان وإطلاقه على مصر يرجع الى السندس او السنديان اى الجنة او الشجر جميل المنظر وهو من اشجار البلوط للتعبير عن جمال الوطن .
2/ البعد عن تفسير الاحلام والبحث عنها فى جوجل مفاهيم مدمرة احيانا لكونها لا تصادف واقع .
3 / هتفضل فيها حاجه حلوة مهما لحق الصورة من شحوب فى الألوان .
4 / زنهار:
(بفتح الزاي وكسرها): وهو اسم فارسي معناه حماية، غير أنه يستعمل للتعجب أيضا
تعليقات
إرسال تعليق