كنت فاكر بقلم رضا ابو الغيط

كُنت فاكر
يوم ما سيبتك
تِنعى حظك ويًا خيبتك
تحت نخله ف بيت بنيته
طوبه طوبه
لجل ما يحافظ عليكى
ويداريكى م الرطوبه
إنى واد ملعون وناكر
للمبادئ و الجميل
انى واد ملعون وقاسى
وان قلبى م المأسى
شكله ناسى
اللى ياما كلامها داوى
قلب م الأشواق عليل
بس بعد ما عقلى ذاكر
والكلام فات الحناجر
والكابوس أصبح حقايق
والغرام أصبح خناجر
شُفت.... وبعينى الدليل
بعد ما أحلامنا هانت
والورود دبلت وماتت
والأمور الغامضه بانت
اتضح مين اللى خانت
واللى باعت
كل شيئ حلو وجميل
اسمعينى وافهمينى
يا اللى كنتى النور لعينى
صعب تانى تقنعينى
ان عينى .. لم تراكى
وان وحش الخوف ليلتها
كان بيجرى كتير وراكى
وان كات الدنيا ليل
اى ليل يستر عيوبك
يا اللى حملتى ف جيوبك
للى راضى يشيل ذنوبك
كل شيئ انا جبته ليكى
لجل نظره من عينيكى
حتى نبضى اللى شاريكى
واللى منك  داق ليلاتى
ألف كاس مليان بويل
كنت فاكر
لما سيبتك
تِنعى حظك ويا خيبتك
تحت نخله ف بيت بنيته
من حنانى
انى ناكر للجميل
وانى واد ملعون أنانى
قلبه شَغله... حُب تانى
بس بعد ما عينى شافت
اللى كان وياكى واقف
واللى داق طعم الشفايف
كان كفايه انى أقولك
دوقى ذُلك
وانى قلبى اليوم ده خايف
يمشى حتى جنب ظِلك
بس قُربك منى جايز
ف المقاهى والجنايز
وانى أقابلك بإبتسامه
وللا أقولك.. بالسلامه
برضو جايز
بس حُبى ليكى تانى
أمر صعب ومستحيل

******************
رضا أبو الغيط