دنيا غريبة
يا دنيا يا غريبة وأخدانا معاكى لفين........
كل يوم فيكى على مستشفى من كل شكل ولون......
أمراض وأوجاع والسبب ضمير معدوم أو أختفى من الكون........
مواد متسرطنة وفساد عشناه فيها سنين من كل صنف ولون....
عداله عميا وكفة مايله المهم إنك فيها تعيش مجنون......
ولازم تعيش حياتك تسبح وتسجد ليل ونهار لكلام ممحون ......
هتأكل ملوث وفاسد ومنتهى صلاحية ما هو أنت معدتك تتحمل كون ......
والحكم عندهم براءة وأنت روح على المستشفى تعالج ما هو أخرك كده يا اللى بتسمع شيطان متلون بكل شكل ولون ........
أنا وأخويا وأبوى وأبن عمى فاتحين بيبان العلل والوجع ما أحنا فيها وليها مهما طال الزمن وأتغير الوان........
هيقولوا مالك ده المرض بلوى وإفتكار رب الكون .....
دانت هتطلع من الدنيا أبيض وعلى جنة الرحمن كما الرهوان .....
وهنصفيلك ذنوبك بعِلّل وأسقام بس انت كل واشرب وعبيها كمان وكمان......
والله ما عايز ذرة وجع ولا دخول مستشفى مهما قلتم
والسبب ضميركم الغائب الساكن فى سابع نوم ....
و عدالتكم العمياء وبراءة السجان من آهة مريض بتكوينى وتكوى العاقلين من كل صنف ولون ......
يا دنيا يا غريبه راحت فيكى صحتى والسبب عيال الحرام ضيعوا فينا ومنا كل طعم ولون.....
والسبب ضمير متهان منداس من زمان ولسه لأخر يوم .....
ومن مستشفى لمستشفى حكاية اليوم وأنا قادر بس تعبان........
طيب الغلبان ممكن يلاقى فيها مكان ؟......
ما هو حتى لو كان فقير لازم يشترى الأبره والشاش ويدفع زيه زى باقى الناس فى الكون ......
بصراحة أنا تعبت خلاص لا نافع مستشفى ولا حتى فيه أمل لصحوة ضمير راحت وتاهت من عقول كانوا بنى أميين........
ولسه بآهَاتِى يوماتى ليلاتى وباقى عندى ذرة أمل فى خلاص ويمكن ترجع الرحمه لقلوب ساكنه ناس ....
ما هو يمكن العداله تصحى ويرجع النور فى كفة الميزان ......
ويرتاح الغلبان من وجع وعِلّل وأسقام ومرار .....
تعليقات
إرسال تعليق