عبدالعال ولؤم التجار
ازيك يا خال عبدالعال ؟
فينك من زمان....
اشتقتلك والله يا خال.....
بطل يا واد لؤم وشغل عيال ....
أنت نسيتنى من زمان ....
آخر مره شفتك كانت ليلة العيد ....
فاكر يا حزين يا أبو مخ شمال ....
يومها قلت لى معلهش يا عبعال ....
اللحمه ب 75 وما فيش هدمه للعيال ......
وقلتلى يومها بتجيب حموضة وحرقان .....
وماشية كده من زمان ....
يومها لسانى ألتزم الصمت وإنجلط فيه حروف الكلام ....
قلت يمكن كلامك صح وأدخل جنة الرحمن .....
جاى يا يتيم بعد ما وصلت بمية وعشرين والرغيف شاحح من الدكان .....
من يوم ما شفتك وأنت فقرى وما بتظهر غير فى اوقات الظلام .....
اللحمة ورريحتها بتجيب حموضه وحرقان....
بطلناها ......
تعرف حتى كمان باعوا الحمير وقالوا عليها علاج يداوى أمراض الغلبان ....
طيب والرغيف وقوت العيال.....
بيجيب أيه يا فقرى قول....
ما أنا عارفك من يومك....
اخبارك زى وشك مش تمام ....
بتبص ليه عليا ...
وفى عيونك كلام .....
ما تحكى يخرب بيت ابوك .....
أنجلطت ولا جالك توهان ....
معلهش يا خال عبدالعال .....
لؤم التجار صابنى وصابك....
وصاب حروف اللسان ...
جيت أسلم وأقلك......
إنى خلاص قررت أسكن معاك ....
ما هو حالى من حالك ....
تعبنا من معسول الكلام ....
ومن قلة الأكل والحرمان......
وعجز اللسان عن قول أصبر ..
ما هو الصبر ....
كمان ليه تسعيرة .....
ولازم ندفعها كمان .....
تعليقات
إرسال تعليق